Қазақ боксының ардақты бапкері Виктор Дмитриев дүние салды.
Қазақстан Республикасының Ұлттық Олимпиадалық комитетінің президенті Геннадий Головкин өзінің алғашқы бапкері, Қазақстан Республикасына еңбегі сіңген жаттықтырушы Виктор Дмитриевтің қайтыс болуына байланысты оның отбасына және барша спорт қауымына қайғыра көңіл айтты.
“Қазақстан Республикасының Ұлттық Олимпиадалық комитеті ұжымы және жеке өз атымнан орны толмас қайғыға байланысты ең шынайы көңіл айтамын”, — делінген ресми мәлімдемеде.
Головкин үшін Виктор Дмитриев жай ғана бапкер емес, нағыз тәрбиеші, бағыт беруші тұлға болған. Өз мәлімдемесінде ол ұстазының спортқа сіңірген еңбегін ерекше атап өтті:
“Виктор Константинович тек үздік жаттықтырушы емес еді – ол ұстаз, тәлімгер, өмірлік үлгі болатын адам болды. Оның спортқа деген адалдығы, кәсібилігі мен әр спортшыға жеке көзқараспен қарау шеберлігі – біздің жүрегімізде мәңгі сақталады”.
Айта кетейік, Виктор Дмитриев – Геннадий Головкиннің алғашқы бапкері. Боксшы өзінің спорттық жолын Қарағандыдағы ГПТУ №1 оқу орнының Майқұдықтағы спорт залында дәл осы маманның жетекшілігімен бастаған болатын.
Дмитриевтің жетекшілігімен жаттығып, GGG кейіннен әлемдік аренада Қазақстан боксының символына айналды.
Головкин өз сөзінде бұл ауыр қайғыны бүкіл спорт қоғамы бөлісіп отырғанын айтып, Виктор Дмитриевтің есімі мен еңбегі ел жадында мәңгі сақталатынын жеткізді.
“Ол тәрбиелеген спортшылар – оның өмірінің жалғасы. Біз оның жарқын бейнесін мәңгі есте сақтаймыз. Жатқан жері жайлы, иманы саламат болсын”, — деді Головкин.
