Alash Pride FC кезекті маңызды жекпе-жекті ресми түрде жариялады. Жеңіл салмақтағы чемпион Руслан Сәриев (13-4) 27 мамырда Астанада Франсиску Фигередомен (13-5-1) октагонда жолығады. Бұл жаңалықты ұйым өзінің ресми Instagram парақшасында растады.
Руслан Сәриев былтыр қараша айында UFC экс-жауынгері Раулиан Пайваны төрешілер шешімімен жеңіп, Alash Pride чемпиондық белбеуін иеленген. Осы сәттен бастап отандық спортшы ел үмітін арқалап, титулын қорғауға мықтап дайындалып жүр.
Франсиску Фигередо — UFC промоушнінде төрт жекпе-жек өткізген тәжірибелі файтер. Ол осы кездесулердің екеуінде жеңіске жетіп, әлемдік деңгейде өз атын танытқан. Бразилиялық спортшы UFC-дің ең жеңіл салмақтағы үздік бес файтері қатарына кіретін Дейвисон Фигередоның туған інісі.
Фигередоның соңғы жекпе-жегі 2022 жылы ирактық Амир Албазиге қарсы өтті. Бұл кездесуде ол мерзімінен бұрын жеңіліп, UFC аренасынан кеткен болатын.
Бұл кездесудің жеңімпазы Азияның MMA аренасында өз позициясын нығайтып қана қоймай, халықаралық деңгейдегі келесі мүмкіндіктерге жол ашуы ықтимал.
