Будапештте өтіп жатқан дзюдодан әлем чемпионатында Қазақстан құрамасының көшбасшысы Абиба Әбужақынова кезекті қарсыласын тамаша тәсілмен ұтып, ширек финалға жолдама алды.
48 келіге дейінгі салмақта ел намысын қорғап жүрген Әбиба Әбужақынова 1/8 финалда Бельгия өкілі Лоис Петитпен белдесті. Жекпе-жек ұзаққа созылмады. Әбиба күтпеген аяқпен шалу (подсечка) әдісін дәл орындап, қарсыласын татамиге түсірді.
Бұл жеңіс шапшаңдық пен техникалық шеберліктің үлгісіндей болды, ал жанкүйерлер оны жоғары бағалауда.
Ширек финалда Әбужақынованы Жапония құрамасының үздігі Кога Вакана күтіп тұр. Бұл жекпе-жек — Әбиба үшін ең қиын сынақтардың бірі болуы мүмкін, өйткені жапон дзюдошылары әрқашан фаворит саналады.
60 келідегі Мағжан Шамшадин жарыс жолын одан әрі жалғастырады. Жерлесіміз 1/8 финалда Бельгия спортшысы Иорре Ферстрэтеннен айласын асырып кетті.
Енді келесі қарсылас - Париж Олимпиадасының қола жүлдегері Рюдзю Нагаяма.
