Буэнос-Айрестегі Casino Buenos Aires аренасында WBA нұсқасы бойынша жеңіл салмақтағы (53,5 кг дейін) уақытша чемпион белбеуі сарапқа салынды.
Рингке аңызға айналған филиппиндік боксшы Нонито Донэйр (43 жеңіс, 8 жеңіліс, 28 нокаут) пен чилилік үміткер Андрес Кампос (17 жеңіс, 3 жеңіліс, 1 тең ойын, 6 нокаут) шықты.
Жекпе-жек бірінші раундтан-ақ шиеленіске толы басталды. Кампос пен Донэйр баспен соғылып қалды. Абырой болғанда, жарақат тіркелмеді. Жекпе-жек жалғасын тапты.
Андрес Кампос атақты қарсыласынан қорыққандай әсер қалдырды. Алғашқы раундтарда белсенділік танытпай, тек қорғанумен шектелді. Донэйрдің тура соққыларын жиі өткізіп алды. Тек төртінші раундтан бастап сәл-пәл шабуыл әрекеттеріне көшті, бірақ тым баяу әрі сақ қимылдады.
Тоғызыншы раундта екінші рет баспен соғылу тіркелді. Бұл жолы Донэйр зардап шекті. Оның көзінің үсті жарылып, қанды жарақат алды. Филиппиндік ардагер кездесуді жалғастырмауға шешім қабылдады. Жекпе-жек тоқтатылып, төрешілердің ұпайы есептелді.
Нәтиже бойынша, барлық төреші бірауыздан Донэйрдің жеңісін тіркеді. Осылайша Нонито Донэйр TD 9 техникалық шешіммен жеңіске жетті.
Жекпе-жектен кейін Донэйр жанкүйерлеріне келесі кездесуде анағұрлым жарқын өнер көрсететінін уәде етті. Бұл оның мансабындағы 44-ші жеңісі болды және ол WBA уақытша чемпионы атағын жеңіп алды.
