Атлантада өткен UFC on ESPN 69 турнирінде көпшіліктің көз тіккен басты жекпе-жегі аяқталды. Нигериялық Камару Усман (20-4) мен америкалық Хоакин Бакли (21-6) арасындағы шайқас жартылай орта салмақта өтті. Бұл салмақта Шавкат Рахмоновтың (19-0) өнер көрсететінін айта кеткен жөн.
Кездесу бес раундқа жоспарланған болатын. Файтерлер соңына дейін күресіп, жекпе-жек толық қашықтықта өтті. Төрешілердің бір ауыздан шығарған шешімі бойынша жеңіс Камару Усманға бұйырды. Айта кету керек, бұл кездесуде фаворит саналмаған Усманның жеңісі нағыз сенсация болды.
Осылайша Камару MMA-де өзінің 21-ші жеңісін тіркесе, Бакли мансабындағы жетінші жеңілісіне ұшырады.
Жартылай орта салмақта жеңілмеген Шавкат Рахмонов UFC рейтингінің үшінші сатысында тұр. Ал Камару Усман бұл кездесуге дейін бесінші орынды, ал Хоакин Бакли жетінші орынды иеленіп келген еді.
Усманның бұл жеңісінен кейін рейтингілік өзгерістер болуы ықтимал. Қазақстандық жанкүйерлер үшін бұл маңызды, себебі бұл өзгерістер Шавкат Рахмоновтың болашақ қарсыластарын анықтауда үлкен рөл атқаруы мүмкін.
