Қазақстандық UFC жұлдызы Шавкат Рахмонов жарақатынан кейін октагонға желтоқсанда оралуға ниетті.
Қазақстандық UFC файтері Шавкат Рахмонов жарақатынан кейінгі октагонға қайта оралу мерзімі жайлы айтты. «Вестник ММА» басылымына берген сұхбатында спортшы 2025 жылдың соңына дейін, нақтырақ айтқанда желтоқсан айында жекпе-жек өткізуді көздеп отырғанын мәлімдеді:
"Өзім де тезірек оралғым келеді. Алдымен жарақатты толық емдеп, 100% дайын болуым керек. Әрине, бірден титул үшін айқасқым келеді. Бірақ бәрі жағдайға байланысты. Ең бастысы – кіммен шықсам да, толық дайын болуым", — деді Рахмонов.
Қазіргі таңда Шавкат Рахмонов – UFC-дің жартылай орта салмақ дәрежесіндегі №3 файтері. Ол осы уақытқа дейін жеңілістің дәмін татпай келе жатыр және MMA жанкүйерлері мен сарапшылар арасында титулға негізгі үміткерлердің бірі саналады.
Спортшы бұған дейінгі айқасынан кейін жарақат алып, біраз уақытқа октагоннан тыс қалған болатын. Енді ол қайтадан жаттығуға кірісіп, қайта қарқын алуға дайындалып жатыр.
