Англияның Бирмингем қаласындағы бокс кешінде күтпеген сенсация болды. WBC тұжырымы бойынша жеңіл салмақтағы уақытша чемпион, 2020 жылғы Олимпиада чемпионы Галал Яфай (9-1, 7 КО) мексикалық тәжірибелі боксшы Франсиско Родригестен (40-6-1, 27 КО) жеңіліп қалды.
Жекпе-жек толық 12 раундқа созылып, төрешілердің шешімімен Яфай ұпай санымен жеңіліс тапты: екі төреші 119-108 және біреуі 118-109 есебін тіркеді.
"Яфай рингте соңына дейін күресті. Родригес оны бірнеше рет нокдаунға түсіре жаздады, бірақ британдық боксшы мәрттікпен шайқасты", – деп жазады DAZN Boxing платформасы.
Мексикалық Родригес үшін бұл жекпе-жек кәсіби мансабындағы 40-шы жеңіс болды. Оның еншісінде 6 жеңіліс пен 1 тең нәтиже бар. Ал Яфай үшін бұл алғашқы жеңіліс. Бұған дейін ол тоғыз жекпе-жектің бәрін жеңіспен аяқтаған.
Қазақстандық бокссүйер қауым үшін Галал Яфайдың аты таңсық емес. Ол 2020 жылғы Токио Олимпиадасында жартылай финалда Сәкен Бибосыновты ұтқан. Сол жекпе-жектен кейінірек Бибосынов рингте көз жасына ерік берген еді. Бұл сәт қазақстандық жанкүйерлердің жүрегінде мәңгі сақталды.
Сол күннен бері Яфайдың кәсіби рингтегі жолы сәтті басталды. Алайда бүгінгі жеңіліс оның мансабында бетбұрыс сәтке айналуы мүмкін.
