2025 жылғы Будапешттегі дзюдодан әлем чемпионатының күміс жүлдегері Әбиба Әбужақынова келер жылы өтетін әлем чемпионатына қатыспайтынын мәлімдеді.
Әбиба "Бірінші Бол" YouTube арнасына берген сұхбатында былай деді:
"Келер жылы әлем чемпионаты бар сияқты. Бірақ біз үшін ең маңыздысы – Азия ойындары. Сондықтан бізді сол жарысқа дайындайтын сияқты", – деді Әбиба.
Спортшының айтуынша, Азия ойындары 2026 жылы өтетін маңызды турнир ретінде белгіленіп отыр. Сондықтан ол әлем чемпионатын өткізіп жіберуі мүмкін.
"Иә, мен әлем чемпионатына қатыспаймын. Бірақ бұл шешімді мен емес, жаттықтырушылар қабылдайды. Егер екі жарыстың арасы ұзақ болса, мүмкін екеуіне де қатысуға болады. Дегенмен негізгі мақсат – Азия ойындары", – деді ол.
Дзюдодан 2026 жылғы әлем чемпионаты Әзербайжан астанасы – Бакуде өтеді. Бұл дода 2028 жылғы Лос-Анджелес Олимпиадасына іріктеу кезеңінің бір бөлігі болмақ.
