Астанадағы бокстан World Boxing кубогының жартылай финалында 50 келі салмақ дәрежесінде өнер көрсеткен Санжар Тәшкенбай жарқырай көзге түсті. Ол әзербайжандық Субхан Мамедовты толық үстемдікпен тізе бүктірді.
Шайқас басынан-ақ Тәшкенбайдың толық бақылауында өтті. Үш раунд бойы қарсыласына бір де бір нақты мүмкіндік қалдырмай, техникалық және тактикалық тұрғыда басымдық танытты. Нәтижесінде төрешілер бірауыздан жеңісті қазақстандық спортшыға берді.
"Санжар бүгінгі жекпе-жекте – мүлде басқа деңгейде болды!", – деп жазды жанкүйерлер әлеуметтік желілерде.
Тәшкенбай жарысты ширек финалдан бастап, алғашқы кездесуінде жапониялық Содаи Котоны сенімді түрде ұтқан. Осылайша ол екі кездесуді қатарынан басымдықпен жеңіп, финалға шықты.Айта кетейік, Санжар – 2023 жылғы әлем чемпионы және 2022 жылғы Азия чемпионатының алтын жүлдегері.
