Қазақстандық кәсіпқой боксшы, орта салмақтағы WBO және IBF тұжырымдары бойынша әлем чемпионы Жәнібек Әлімханұлы Доминикан Республикасынан шыққан WBC белбеуінің иегері Карлос Адамеске ашық мәлімдеме жасады.
Әлімханұлы өзінің X (бұрынғы Twitter) парақшасында Карлос Адаместі ашық сынға алып, титул үшін жекпе-жек өткізгісі келетінін жазды.
“Қорқақ! Контрактке қол қой! Немесе белбеуді маған бер! Сен маған қызық емессің! Сен – ешкімсің! Маған тек титул керек!
Адамес дегенің – мен үшін ештеңе емес. Онымен жекпе-жек өткізу де, оны жеңу де қызық емес. Өйткені ол бокс әлемінде аты шықпаған спортшы. Маған тек оның белбеуі маңызды!” – деп жазды Жәнібек.
Жәнібек қазір орта салмақта екі белбеудің (WBO және IBF) иесі. Егер ол WBC белбеуін де жеңіп алса, абсолют чемпион болуға бір қадам жақындайды. Бұған дейін Әлімханұлы біріктіруші жекпе-жекке дайын екенін бірнеше рет мәлімдеген.
Алайда WBC белбеуінің қазіргі иесі Карлос Адамес тарапынан ресми келісім болмай отыр, бұл жанкүйерлер мен бокс мамандары арасында түрлі пікір туғызуда.
