Данияр Елеусінов Дана Уайттың қарамағына өтуі мүмкін

Қазақстандық Олимпиада чемпионы Данияр Елеусінов UFC президенті Дана Уайт пен Сауд Арабиясының танымал спорт функционері Турки Әл аш-Шейх іске қосатын жаңа бокс лигасына қатысушылардың алдын ала тізіміне енді.

Жаңа промоушен қандай болмақ?

UBO (Ultimate Boxing Organization) атты жаңа жоба UFC қағидаларына сүйенеді. Яғни бұрынғыдай WBO, WBA, WBC, IBF сынды ұйымдардың бір-біріне қайшы рейтингтері болмайды. Бір дивизионда тек бір чемпион анықталады.

Мұндай формат жанкүйерлерді қызықтыратын басты факторға айналмақ: ең мықтылар тек мықтылармен айқасады. Бұған қоса, промоутерлер арасындағы даулар мен допинг мәселесі де бұл лигада кездеспеуі тиіс.

Brunch Boxing-тің хабарлауынша, UBO-да өнер көрсетуі мүмкін боксшылардың арасында:

• Данияр Елеусінов (Қазақстан),
• Брэндон Адамс (АҚШ),
• Каллум Уолш (Ирландия),
• Сергей Богачук (Украина).

Соңғы екеуі 360 Promotions компаниясының боксшылары. Бұл ұйымды Том Лёффлер басқарады – ол қазақстандықтарға Геннадий Головкиннің промоутері ретінде жақсы таныс әрі Дана Уайтпен серіктестік орнатқан маман.

Данияр Елеусінов жайлы

• Олимпиада чемпионы (Рио-2016, 69 кг).
• Әлем чемпионы (2013).
• Азия ойындары мен Азия чемпионаттарының екі дүркін жеңімпазы.
• Кәсіпқой бокста – жартылай орта салмақта (welterweight) өнер көрсетеді.