Бокстан Қазақстан ерлер құрамасы Ташкенттегі халықаралық оқу-жаттығу жиынын екі апта бойы жалғастырады.
ҚБФ Instagram-парақшасында Ташкенттегі Олимпиадалық даярлық орталығында түсірілген жаттығу сәттерінен бейнежазба жарияланды. Кадрларда Қазақстан боксшыларының жоғары қарқынмен жұмыс істеп жатқаны, залдағы құрал-жабдықтар мен спарринг үдерісі көрініс тапқан.
Федерация мәліметінше, ерлер құрамасы Өзбекстан астанасында бірлескен халықаралық оқу-жаттығу жиынын өткізіп жатыр. Бұл жиын алдағы ірі турнирлерге дайындықтың маңызды бөлігі саналады.
Ұйым тарапынан таратқан ақпаратта бірлескен жиынға бірнеше елдің командалары қатысып жатқаны айтылды:
«Халықаралық дайындық кезеңі аясында Қазақстан, Өзбекстан, Қырғызстан, Тунис және басқа да мемлекеттердің боксшылары өзара тәжірибе алмасып, спаррингтер өткізіп жатыр», – делінген федерацияның әлеуметтік желідегі жазбасында.
Осылайша Орталық Азия мен Африка елдері өкілдері бір рингте дайындық өткізіп, тактикалық және техникалық тұрғыда бір-бірінен үйренуге мүмкіндік алып отыр.
Қазақстан бокс федерациясы Ташкенттегі оқу-жаттығу жиыны 19 қарашада басталғанын хабарлады.
