Тайсон Фьюридің промоутері өзбек жұлдыздарымен келісімшартқа отырды

Әлем және Олимпиада чемпиондары – Queensberry жобасы

Queensberry ресми түрде өзбек боксшыларының кәсіпқой рингтегі жан-жақты мүмкіндігіне сенетінін мәлімдеді.

Қос боксшы да 2025 жылдың қыркүйегінде World Boxing ұйымы өткізген әлем чемпионатында (ЧМ-2025) топ жарды. Жолында Қазақстан боксшылары да кездесті. 

• Джавохир Умматалиев (80 кг, 20 жас) Олимпиада-2024-тің күміс жүлдегері Нұрбек Оралбайды ширек финалда жеңді;
• Асадхуджа Муйидинхуджаев (65 кг, 24 жас) Қазақстан боксшысы Ертуған Зейнуллиновтен басым түсті.

Муйидинхуджаев бұған дейін де 2023 жылдың әлем чемпионы атанған. Ал Умматалиевтің жетістіктері де аз емес:

• 2024 жылғы Азия чемпионы;
• 2022 жылы жастар арасында әлем чемпионы.

Queensberry өкілдері бұл дуэтті болашақта әлемдік титулдарды иеленіп, үлкен жұлдызға айналатын боксшылар қатарына қосып отыр.

«Бұл есімдерді есте сақтаңыздар: Асадхуджа Муйидинхуджаев пен Джавохир Умматалиев. Бұл – жарқын болуы тиіс кәсіби мансаптардың басы ғана», – деп атап өтті компания.

Кәсіпқой рингтегі дебют

Өзбек боксшылары кәсіпқой бокстағы алғашқы жекпе-жегін 28 қараша күні Ресейдің Челябі қаласында өткізеді.

Олардың қарсыластары да мықтылар қатарынан: 

• Муйидинхуджаевтың қарсыласы – 26 жастағы қазақстандық Айдос Тастаев (8–7, 2 КО);
• Умматалиевке қарсы 31 жастағы әзербайжан боксшысы Рахим Алиев (3–0, 3 КО) рингке шығады.

Осылайша өзбек жұлдыздарының кәсіби дебютінде қазақ боксшысы да басты текетірестердің біріне қатыспақ.

Queensberry – Тайсон Фьюриді шығарған промоутер

Queensberry Promotions – әлемдегі жетекші промоутерлік компаниялардың бірі. Оны 1980 жылы танымал функционер Фрэнк Уоррен құрған.

Уақыт өте келе дәл осы компанияның аясында мынадай жұлдыздар шықты:

• Насим Хаммед
• Рикки Хаттон
• Джо Кальзаге
• Амир Хан және басқа да британдық чемпиондар.

Қазір Queensberry-дің басты жұлдызы – ауыр салмақтың супержұлдызы, WBC чемпионы Тайсон Фьюри. Енді осы тізімге өзбек боксшылары да қосылып отыр.