Бокстан Қазақстан құрамасының мүшесі, екі дүркін әлем чемпионы Махмұд Сабырхан әлеуметтік желіде жұртшылыққа арнап жазба жариялады.
Боксшы жыл қорытындысына тоқталып, өзіне, отбасына және ел спортына маңызды кезең болғанын атап өтті. Сабырханның айтуынша, інісі Төреханмен бірге әлем чемпионатында топ жарып, қазақ боксының тарихына есімдерін жазды. Сонымен қатар оның өзі әлемнің үздік боксшысы ретінде бағаланғанын ерекше айтты.
Instagram парақшасында жариялаған жазбасында спортшы еңбектің бағасын былай жеткізді:
«Әр дайындық — маңдай тер, әр тер — жеңіске жасалған қадам. Қиын сәттер болды, тоқтағың келетін кездер де кездесті. Бірақ берілмедім. Себебі спорт тек денені емес, мінезді де шыңдайды. Жаңа жылда да ел сенімін ақтау үшін осы жолдан таймаймын — бәрі Алланың қалауымен», — деді Махмұд Сабырхан.
Еске сала кетейік, World Boxing ұйымы Махмуд Сабырханды 2025 жылдың үздік боксшысы деп таныды. Бұдан бөлек, ұйым жанкүйерлері оның филиппиндік Аарон Джудқа қарсы жекпе-жегін жылдың ең үздік айқасы ретінде таңдаған.
Аталған кездесу шілде айында Астанадағы әлем кубогының ширек финалында Махмұдтың екінші раундтағы техникалық нокаутымен аяқталған.
