Ол ұйым жұмысында боксшылардың рөлін күшейту негізгі міндет екенін атап өтті.
World Boxing ұйымының президенті Геннадий Головкин 2026 жылға арналған негізгі мақсаттарымен бөлісті. Головкиннің айтуынша, World Boxing ұйымының басты құндылығы – спортшылар. Ол ұйым жұмысында боксшылардың рөлін күшейту негізгі міндет екенін атап өтті.
«Спортшылар — World Boxing-тің жүрегі және басты мақсаты. Біз басқару жүйесінде олардың рөлін кезең-кезеңімен арттырамыз, іріктеу мен жолдама алу процесін әділ әрі ашық етеміз, сондай-ақ спортшылардың құқықтары мен мүдделерін қорғаймыз», — деді Головкин.
Ұйым басшысы физикалық дайындықпен қатар, психологиялық қолдауға да ерекше назар аударылатынын жеткізді. Сонымен қатар боксшылардың кеңесші және өкілдік құрылымдарға толыққанды қатысуы қамтамасыз етіледі.
Головкин өз ұстанымының нақты әрекетке негізделетінін атап өтті:
«Мен сөзден гөрі іске мән беретін адаммын. Барлық мүше ұйымдармен тұрақты байланыста боламын және алдағы жылы тығыз бірлескен жұмысқа дайынмын», — деді ол.
World Boxing президенті алдағы жыл ұйым үшін шешуші кезең болатынын айтып, ортақ мақсатқа бірігуге шақырды.
«Біз бірге World Boxing-тің тұрақты әрі табысты болашағына мықты іргетас қалаймыз. 2026 жыл – қарқынды еңбек, нақты прогресс және ортақ жетістіктер жылы болсын», — деп түйіндеді Геннадий Головкин.
Геннадий Головкин 2025 жылдың соңында World Boxing ұйымының президенті болып сайланды. Бұған дейін ол ұйымның олимпиадалық комиссиясының төрағасы қызметін атқарған.
