Еркебұлан Тоқтар ресейлік поп-ММА жұлдызымен жұдырықтасады
Қазақстандық ММА файтері әрі актер Еркебұлан Тоқтар ресейлік Артем Тарасовпен IBA Nomad 15 турнирінде кездеседі.
Тоқтар — Тарасов жекпе-жегі ресми бекітілді
Қазақстандық ММА файтері әрі актер Еркебұлан Тоқтар кезекті кездесуін ресейлік спорт блогері және ММА өкілі Артем Тарасовқа қарсы өткізеді. Бұл жекпе-жек Алматыдғы IBA Nomad 15 турнирінің басты айқастарының бірі болмақ.
Кездесу 4 шілде күні өтеді. Қарсыластар жартылай орта салмақ дәрежесінде бақ сынайды.
IBA Nomad 15 турниріндегі тартысты кездесу
Ұйымдастырушылардың ресми мәліметінше, Тоқтар мен Тарасов арасындағы айқас көпшілік күткен медиялық әрі спорттық текетірестердің қатарына кіреді.
"Еркебұлан Тоқтар — Артем Тарасов. Жартылай орта салмақтағы жекпе-жек. IBA Nomad 15 турнирінде қос файтер рингте барлық сұраққа жауап бермек. Екі спортшы да жанкүйерлерге тартысты айқас пен нағыз шоу ұсынуға дайын", — делінген ресми постерде.
Еркебұлан Тоқтардың соңғы жекпе-жегі
Еркебұлан Тоқтар соңғы рет 28 наурызда Ереванда Hype Asia турнирінде өнер көрсетті. Ол кездесуде қазақстандық файтер қырғызстандық Марсель Нурланбек уулуға қарсы шыққан еді.
Айқас бокс ережесі бойынша ММА қолғаптарымен өтті. Нәтижесінде Тоқтар қарсыласына төрешілердің бірауыздан шығарған шешімімен есе жіберді.
Артем Тарасов кім?
Артем Тарасов — Ресейдегі танымал спорт блогері әрі ММА файтері. ТМД аумағындағы поп-ММА индустриясының алғашқы өкілдерінің бірі және осы бағыттың танымал тұлғалары қатарында аталады.
Тарасов спорттық мансабын медиялық белсенділікпен қатар алып жүр. Ол кәсіби лигаларда да, түрлі көрме форматындағы шоуларда да жекпе-жек өткізіп келеді. Соның ішінде "ММА Серия" секілді ұйымдардағы кездесулері арқылы жанкүйерлерге жақсы таныс.
Оның соңғы жекпе-жегі 6 мамырда NWPA промоушені аясында өтті. Тарасов отандасы Роман Ткачты бірінші раундта қылқындыру әдісімен жеңді.