Қазақ боксшылары қарсыластарын нокдаунға жіберіп, Азия чемпионатының финалына шықты

Қарсыласын үш мәрте нокдаунға жіберді

U19 санатындағы 80 келіге дейінгі салмақта өнер көрсететін Айдана Убайдуллақызы жартылай финалда Қырғызстан боксшысы Мээрим Чыныбековамен қолғап түйістірді. Қазақстандық былғары қолғап шебері жекпе-жекті толық бақылауда ұстап, қарсыласын үш рет нокдаунға түсірді. Нәтижесінде төреші кездесуді мерзімінен бұрын тоқтатып, Айдана техникалық нокаутпен жеңіске жетті. 

Камила Оспанова финалда

70 келіге дейінгі салмақта сынға түсетін Камила Оспанова жарысты бірден жартылай финалдан бастады. Ол финал жолдамасы үшін Оңтүстік Корея өкілі Мина Жангпен кездесті. Алғашқы раундта қазақстандық боксшы айқын басымдық танытып, 4:1 есебімен төрешілердің қолдауына ие болды.

Кейінгі раундтарда да басымдықты уысынан шығармаған Оспанова үшінші кезеңде қарсыласын нокдаунға жіберіп, кездесуді төрешілердің шешімімен өз пайдасына аяқтады. Нәтижесінде Камила да U19 санатындағы Азия чемпионатының финалына жолдама алып, алтын медаль үшін жұдырықтасатын болды.