"Аңыз файтерлер": Шавкат Рахмонов үш есімді атады
Қазақстандық файтер бұл туралы ALF Global YouTube арнасына берген сұхбатында айтты.
Қазақстандық UFC файтері Шавкат Рахмонов аралас жекпе-жекте өзі ерекше құрметтейтін үш спортшыны атады. Оның таңдауы Федор Емельяненко, Мирко "Крокоп" Филипович және Джон Джонсқа түсті. Рахмонов бұл пікірін ALF Global YouTube арнасына берген сұхбатында айтты.
Қазақстандық спортшы әсіресе ресейлік ауыр салмақтағы Федор Емельяненконың жекпе-жектерін қызыға тамашалағанын жеткізді.
"Маған Федор Емельяненко ұнайтын. Шынымды айтсам, Федор, Мирко Крокоп және Джон Джонс – ең аңыз файтерлер", – деді Рахмонов.
Осылайша, Шавкат өзінің ММА әлеміндегі үздік үштігіне әр кезеңде спорттың дамуына айтарлықтай ықпал еткен үш танымал спортшыны енгізді.
Шавкат Рахмоновтың UFC-дегі көрсеткіші
Рахмоновтың кәсіби мансабында 19 жеңіс бар және ол әлі жеңіліп көрмеген. Қазақстандық файтер соңғы рет 2024 жылдың желтоқсанында октагонға шығып, ирландиялық Иэн Гэрриді жеңген еді.
Рахмонов бұған дейін M-1 Global чемпионы атанды. Кейін UFC-дің жартылай орта салмағында өнер көрсетіп, дивизиондағы жетекші файтерлердің біріне айналды.
Ұзақ уақыт жекпе-жек өткізбегеннен кейін 2026 жылдың ақпанында қазақстандық спортшы UFC-дің жартылай орта салмақтағы ресми рейтингінен шығарылды.
Пікірлер
Пікір қалдыру уақытша жабық.
Әзірге пікір жоқ. Бірінші болыңыз.