"Ұлы боксшы": "Канело" Головкинді ерекше атап өтті
Сауль Альварес пен Геннадий Головкин кәсіпқой рингте үш рет бір-біріне қарсы шыққан болатын.
Мексикалық боксшы Сауль "Канело" Альварес өзінің бұрынғы қарсыласы, қазақстандық Геннадий Головкинге ерекше тоқталып, шеберлігіне жоғары бағасын берді.
DAZN ұйымдастырған блиц-сауалнама барысында екінші орта салмақтағы бұрынғы абсолютті әлем чемпионы өзі рингте кездескен немесе болашақта жұдырықтасуы мүмкін боксшыларға қысқаша сипаттама берген болатын.
"Канело" Головкинді "ұлы боксшы" деп атады
Геннадий Головкин туралы сұраққа Альварес қысқа әрі нақты жауап берді:
"Ұлы боксшы".
Мексикалық спортшы дәл осындай жоғары бағаны тек ресейлік Дмитрий Бивол мен америкалық Теренс Кроуфордқа берді.
Альварес өзге қарсыластары мен әріптестерін бұдан қарапайым сипаттаған.
Ол Хайме Мунгия мен Джермелл Чарлоны "жақсы боксшылар" деп атады. Кристиан Мбиллиге "жақсы, мықты" деген баға берді.
Ал Эдгар Берланган "күлкілі", Уильям Скаллды "марафоншы-боксшы", ал Билли Джо Сондерсті "трэш-токер" деп сипаттады.
Головкин мен "Канело" үш рет кездесті
Сауль Альварес пен Геннадий Головкин кәсіпқой рингте үш рет жұдырықтасты. Олардың алғашқы жекпе-жегі 2017 жылы өтіп, тең нәтижемен аяқталды.
Кейінгі екі кездесуде төрешілер жеңісті мексикалық боксшыға берді.