UFC-дің уақытша чемпионатының бұрынғы иегері, жеңіл салмақтағы Джастин Гэтжидің UFC 313 турниріндегі жаңа қарсыласы белгілі болдqы.
8-9 наурызға қараған түні Лас-Вегаста өтетін кеште Гэтжиге қарсы қазақстандық файтер Рафаэль Физиев шығады. Ол жарақат алған Дэн Хукердің орнын басады.
Бұл жекпе-жек қос файтер үшін таныс қарсыластықтың жалғасы болмақ. 2023 жылдың наурызында олар алғаш рет UFC 286 турнирінде кездескен еді. Кездесу жанкүйерлер мен сарапшылардың жоғары бағасын алып, кештің үздік жекпе-жегі деп танылды. Бірақ тартысты айқаста төрешілердің көпшілік шешімімен жеңіс Гэтжиге берілді.
Гэтжи сол жеңістен кейін екі рет октагонға шықты. Алдымен ол Дастин Порьені нокаутпен жеңсе, кейін BMF белбеуі үшін болған жекпе-жекте Макс Холлоуэйден бесінші раундтың соңғы секундына дейін созылған шайқаста нокаутпен жеңілді.
Ал Рафаэль Физиев 2023 жылдың қыркүйегінде бір ғана жекпе-жек өткізіп, Матеуш Гамротпен кездескен. Алайда екінші раундта шабуыл жасау кезінде алған тізе жарақатына байланысты жекпе-жекті жалғастыра алмады.
Қазақстандық файтер бұл кездесуге ерекше дайындықпен келмек. UFC 313 турнирінде Физиев Гэтжиден өткен жеңілістің есесін қайтаруға тырысады. Жанкүйерлердің күткен реваншы қай спортшының дайындық деңгейі жоғары екенін көрсетпек.
