Қазақстан Ішкі істер министрлігі мас күйінде көлік басқарудың қайғылы салдарын көрсету мақсатында шынайы видео жариялап, қоғам назарына дабыл қақты.
ІІМ ресми өкілі Шыңғыс Әлекешевтің айтуынша, соңғы бес жыл ішінде ішімдік ішіп рульге отырған жүргізушілер 2 500-ден астам жол апатына себепші болған. Соның салдарынан 460-тан астам адам қайтыс болып, 3 300-ден аса адам жарақат алған.
"Бұл жай сандар емес – бұл тағдыры күйреген отбасылар, жетім қалған балалар, баласынан айырылған ата-аналар. Мас күйде көлік жүргізу – тек құқықбұзушылық емес, бұл – адам өміріне қауіп төндіретін қылмыс", — деп мәлімдеді ол.
Министрліктің мәліметінше, кейбір азаматтар қазір мас күйінде көлік басқарғаны үшін салынған әкімшілік жазаны жоюды талап етіп отыр.
Алайда ІІМ бұл ұсынысты түбегейлі орынсыз деп есептейді:
"Әкімшілік құқықбұзушылық туралы кодекстің 608-бабындағы жазаны жұмсартуға келісе алмаймыз. Мас жүргізушілерге жеңілдік жасау – қоғамның қауіпсіздігіне төнген қатермен тең", — дейді Әлекешев.
Мысалы жуырда Алматыда болған соққы толы жол-көлік апаты қоғамның есінен кетпек емес.
"Жол жұмысын атқарып жатқан екі қызметкерді мас жүргізуші қағып кетті. Екеуі де қаза тапты. Олар – өз міндетін орындап жүрген, бейбіт күнде ажал құшқан азаматтар. Бұл — жауапсыздықтың құрбандары", — деп қосты министрлік өкілі.
Бұған қарамастан ІІМ мас күйінде көлік жүргізуге қарсы қабылданған шаралардың нәтижесін де атап өтті:
"Көлік саны жыл сайын артып жатқанына қарамастан мас күйде ұсталған жүргізушілер саны төмендеген. Бұл – біздің жұмысымыздың оң нәтижесі", — дейді Әлекешев.
