79 жастағы британдық инженер қатерлі дертке шалдыққанын мәлімдеді.
Гордон Мюррей — "Формула-1" тарихындағы ең табысты автокөлік инженер-дизайнерлерінің бірі. Ол 1970-1980 жылдары Brabham және McLaren командаларында жұмыс істеп, жарыс болидтерін жасауда үлкен жетістікке жеткен. Техникалық шешімдері спорт әлемінде төңкеріс жасаған болатын.
2007 жылы McLaren командасынан кетіп, Gordon Murray Design деп аталатын жеке инженерлік бюро құрды. Бұл компания көлік дизайны мен прототиптеу саласында жұмыс істейді.
Мюррейдің айтуынша, ол соңғы 15 жыл бойы жыл сайын эндоскопия мен биопсия тексерулерінен өтіп келген. Ақыры осы процедуралардың бірінде өңеш қатерлі ісігі анықталған.
"Өңеш рагы – өте қауіпті дерт. Оның белгілері кеш білінеді, сол себепті өмір сүру мүмкіндігі өте төмен", — деді Мюррей PlanetF1 басылымына берген сұхбатында.
Оған химиотерапия тағайындалып, кейіннен күрделі хирургиялық операция жасалды. Қазір ол белсенді жұмысқа оралғанымен тамақты тек зонд арқылы қабылдай алады.
Гордон Мюррейдің бастан өткерген ауыр дертке қарамастан кәсіби қызметке оралғаны — ерлік пен табандылықтың жарқын мысалы. Оның оқиғасы өңеш қатерлі ісігінің алдын алудың маңыздылығын, дер кезінде тексеруден өтудің қажеттілігін көрсетеді.
