Бұл туралы аталған шоуды ұйымдастырушы Мәлік Хасенов мәлімдеді.
1 тамыз күні елордадағы «Астана Аренада» өтетін Дженнифер Лопестің концертіне байланысты «Астана Концерт» компаниясының продюсері Мәлік Хасенов брифинг өткізіп, Астана-Аренада өтетін концертке неліктен дәл осы әлемдік жұлдыз таңдалғанын түсіндірді.
Мәлік Хасенов әзілмен сөз бастап, Лопес пен Қайрат Нұртастың арасындағы таңдаудың қалай жасалғанын айтып өтті:
«Қиын таңдау болды. Біз Дженнифер Лопес пен Қайрат Нұртас екеуінің біріне таңдау жасадық. Сосын бағаларын салыстырып көрдік. Бағасы арзан болған соң, таңдау Дженнифер Лопеске түсті», – деді ол Орталық коммуникациялар қызметінде өткен брифингте.
Оның айтуынша, нақты шешім қабылдауға жарты жыл уақыт кеткен. Осы кезеңде продюсерлік топ 13 түрлі әлемдік жұлдыздың гастрольдік бағыттарын зерттеген.
Мәлік Хасеновтің айтуынша, таңдау барысында әртістің танымалдығы мен гонорары, логистика мүмкіндіктері де есепке алынған.
«Меніңше, Instagram-да 258 млн жазылушысы, бізден он есе көп тыңдарманы бар әртістің бізге келуі өте керемет», – деді ол.
Жаңа концерт Дженнифер Лопестің Up All Night атты әлемдік турының аясында өтеді. Тур 1 шілдеде басталып, 3 тамызға дейін жалғасады. Әнші Анталья, Ыстамбұл, Мадрид, Барселона, Будапешт, Варшава, Бухарест және Абу-Даби сынды қалаларда өнер көрсетеді. Қазақстан – бұл тізімдегі маңызды нүктелердің бірі.
Билеттер 11 сәуірде ресми түрде сатылымға шығарылады.
