22 сәуір таңғы сағат 6:00 шамасында Атыраудағы Халел Досмұхамедов атындағы университеттің №2 жатақханасының бір бөлігі құлады.
Оқиға Студенттер даңғылы, 29 мекенжайында болды. Бұл жатақхана 1972 жылы пайдалануға берілген. Мамандардың айтуынша, 2022 жылдың қараша айында университеттің шаруашылық бөлімі ғимараттың бірінші қабатындағы қабырғадан жарық байқап, тиісті органдарға хабар берген.
Кейін Атырау облыстық мемлекеттік сәулет-құрылыс бақылау басқармасы ғимаратқа техникалық тексеріс жүргізіп, оны апатты және тұруға жарамсыз деп таныған.
Жатақханада 2023 жылдың 1 ақпанынан бастап студенттер тұрмаған. Құзырлы органдар ол жерде адамдардың өміріне қауіп төнуі мүмкін екенін ескертіп, уақытылы эвакуация жүргізген.
Сол себепті бұл жолы зардап шеккендер мен қаза тапқандар тіркелген жоқ.
Қазір Атырау облысының құрылыс басқармасы университетпен бірлесіп, екі апатты жатақхананы толықтай бұзу және 1000 орындық заманауи жаңа жатақхана салу жұмыстарын бастады.
