Қазақстандық танымал актриса Жазира Еркін қоғам тарапынан психологиялық қысымға ұшырап жүргенін "Айтарым бар"» подкастында ашық айтты.
Оның айтуынша, тұрмыс құрмағаны үшін көпшілік оны “толық емес адам” ретінде қабылдайды.
“Менің қазіргі әлеуметтік мәртебем — қысымның басты себебі. Тұрмыс құрмағаныма байланысты жиі түсініксіз пікірлер естимін. Кейбір отырыстарда “Сен әлі ештеңеге қол жеткізбедің бе? Ешкім жоқ па? Бопты, бәлкім бірдеңе болар” деген сөздер айтылады. Мұндай қарым-қатынас менің көңіліме қатты тиеді”, — деді актриса.
Ол бұл жағдайдан қатты шаршап, ішкі күйзелістермен күресу үшін өзін түрлі бағытта дамытуға тырысатынын жеткізді.
“Жәй отырсам, ішкі уайым мені жайлап алады. Сол себепті өзімді жан-жақты дамытуға тырысамын. Хоббимен айналысу – менің өмірімнің маңызды бөлігіне айналды. Бұл маған тірек, әрі өзіме деген қамқорлықтың бір түрі”, – дейді Жазира Еркін.
Актриса қоғамдағы әйелге деген қатып қалған түсініктер мен стереотиптерді өзгерту керек екенін де меңзеді. Оның сөзінше, әр адамның өмір жолы мен таңдауына құрметпен қарау – қоғамның сау әрі әділетті болуына негіз болады.
