Белгілі әнші Қайрат Нұртастың екінші қызы, би өнерімен танылған блогер әрі контент жасаушы Алау Нұртас әлеуметтік желідегі тікелей эфирде тыңдармандар сұрақтарына жауап берді. Оның кейбір сөздері көпшілікті ойландырып қойды.
Желі қолданушыларының бірі:
"Сізді жеке тұлға ретінде емес, Қайрат Нұртаспен байланыстырған кезде бұл сізге әсер ете ме?" — деп сұрады.
Алау бұл сұраққа шынайы жауап қатты:
"Әрине, әсер етеді. Тіпті қатты тиеді. Себебі мен дүниеге келгенде маған ''Қайрат Нұртастың қызы'' деген есім берілген жоқ. Маған ''Алау'' деген ат қойылды. Бұл – менің жеке есімім. Егер маған біреу: ''Сен Қайраттың қызысың ғой, бірге суретке түссек бола ма?'' десе, келіспеймін", — деді ол.
Алау туралы тек әкесі емес, әжесі әрі продюсер Гүлзира Айдарбекова да ерекше пікір білдірген еді. Ол өзінің әлеуметтік желідегі жазбасында немересіне деген махаббатын былай жеткізді:
"Бұл — менің жалғыз әрі ерекше қызым — Алау. Оның есімін ешкімге қойылмаған ерекше атау болсын деп, жалғыз бөлмеде таң атқанша жатып ойлап таптым. Бұған дейінгі алғашқы немеремді Сезім деп атап едім — ол сезімтал болып өсті. Ал Алау — отты, жарқын, көзге бірден түсетін қыз болсын деп тіледім. Қазір де осы қызымды ерекше жақсы көрем. Құдай өмір берсе, тіпті бриллианттарым да соған қалсын деп отырмын. Би билей бер, қызым!", — деп жазды продюсер.
Алау Нұртас өз тұлғасын ата-анасының атағынан бөлек қалыптастырғысы келеді. Ол — өз жолын тауып келе жатқан талантты жас. Қоғамда қалыптасқан "жұлдыз баласы" деген стереотипке қарсы тұрған Алаудың бұл мәлімдемесі көп жастың жүрегіне жол табуы мүмкін.
