Қазақстанның ең жарқын әрі атақты спортшыларының бірі, бокс рингінде ел тарихын жазып келе жатқан Ангелина Лукас бұл жолы жанкүйерлерін спорттан бөлек шығармашылық қабілетімен таңғалдырды. Ол Instagram парақшасында қазақ тілінде ән шырқап, елге деген махаббатын білдірді.
Ангелина өзінің парақшасында “Мен қазақпын” әнін орындаған бейнебаянын жариялады.
“Сәлем, қымбатты достарым! Халқым – менің мақтанышым, бұл әнді сіздерге арнаймын. Қуаныш Рахымға сенім білдіргені үшін үлкен рақмет!”, – деп жазды ол.
Клипте спортшы қазақтың әсем ұлттық киімдерін киіп, табиғат аясында ән шырқайды. Көріністер арасында оның рингтегі жеңістері бейнеленіп, бейнебаянға ерекше әсер береді.
Ән орындау барысында Ангелинаның туған елге деген ыстық ықыласы анық сезіледі.
“Қиын сәттерде де өз халқымның қолдауын сездім. Қазақстанымды сүйемін! Спорт мені шыңдады, ал туымыз – бірлігіміз бен тәуелсіздігіміздің нышаны. Онымен әрдайым мақтанамын”, – деді спортшы.
Фанаттары Лукасқа жылы лебіздерін білдіріп, пікірлер қалдырды:
“Клип үшін құттықтаймыз! Шын жүректен шыққан махаббат пен адалдықты керемет жеткіздің. Ұлттық нақыш, сәнді киімдер және қуатты энергетика бірден сезіледі. Ән патриоттық рух сыйлайды, жүрекке әсер етеді!” – деп жазды жанкүйерлердің бірі.
Айта кетейік, бұған дейін Ангелина Лукас вокалдан сабақ алып жүргенін және шығармашылыққа ден қойғанын айтқан еді. Сонымен қатар, жуырда спортшыға “Қазақстан Республикасының Құрметті спорт қайраткері” атағы берілген болатын.
