Канадалық бодибилдер бір күнде 9 Гиннес рекордын орнатты!

Нұрғалиева Сая

Сарапшы, спорт журналисі

30.08.2025, 16:30

Канадалық аспаз әрі бодибилдер Уоллес Вонг спорт және гастрономия әлемін таң қалдырды. Ол бір күннің ішінде тоғыз бірдей Гиннестің рекордын орнатып, тарихқа енді.

Фото: tengrisport.kz

Вонгтың еншісінде барлығы – 11 ресми рекорд. Бұл туралы Tengri Sport хабарлайды.

Ерекше жылдамдық пен дәлдік

Вонг өзінің пышақпен жұмыс істеудегі шеберлігінің арқасында атаққа ие болды. Оның ең танымал жетістіктерінің қатарында:

көзін байлап тұрып 30 секундта 166 тілім қияр турау;
көзін байлап тұрып 30 секундта 121 тілім сәбіз турау;
бір минутта 14 қызанақты турау;
көзін байлап тұрып бір минутта 9 қызанақты турау;
30 секундта 117 түйір сарымсақ турау;
көзін байлап тұрып 30 секундта 127 түйір сарымсақ турау;
30 секундта 128 тілім балдыркөк турау;
көзін байлап тұрып 30 секундта 125 тілім балдыркөк турау;
30 секундта 13 ащы чили бұрышын турау;
болгар бұрышын тураудағы ең жылдам уақыт – 9,43 секунд;
көзін байлап тураудағы рекорд – 10,78 секунд.

«Әлемдік рекорд лапшасы»

Ең қызығы, Уоллес Вонг бір күнде орнатқан 9 рекордтың өнімдерін ысырап етпей, ерекше тағам әзірледі. Ол қияр, сәбіз, балдыркөк, сарымсақ пен бұрыштан «Әлемдік рекорд лапшасын» жасап шықты.

Уоллес Вонгтың рекордтары пышақпен жұмыс істеу өнерін жаңа деңгейге көтеріп, аспаздық әлемге жаңа леп әкелді.