"Қайратқа" керемет мүмкіндік: УЕФА клубтық турнирлерге өзгеріс енгізді

УЕФА 2025/26 маусымынан бастап ерлер арасындағы клубтық турнирлер регламентіне өзгеріс енгізді. Жаңа қағидаға сәйкес, командалар жалпы кезеңнің 6-турына дейін ұзақ мерзімді жарақат алған немесе сырқаттанған бір ойыншыны уақытша ауыстыра алады.

УЕФА-ның ресми сайтында жарияланған ақпаратқа сүйенсек, басты мақсат – командалардың ойын сапасын төмендетпей, әділ бәсекелестікті сақтау. Бұған қоса, жаңа ереже футболшылардың денсаулығын қорғауға бағытталған: қысқа құраммен ойнау кезінде қалған ойыншыларға шамадан тыс жүктеме түспек.

Қай кезде қолдануға болады?

Жаңа регламентке сәйкес:

• Командалар ұзақ уақыттық жарақат немесе ауруға байланысты бір ойыншыны ғана ауыстыра алады;
• Бұл өзгеріс тек жалпы кезеңнің 6-турына дейін рұқсат етіледі;
• Уақытша ауыстырылған футболшы клубқа ресми түрде тіркеліп, жарысқа қатысу құқығына ие болады.

2025/26 маусымындағы УЕФА Чемпиондар лигасының жалпы кезеңі 16 қыркүйекте басталады. Биылғы маусымда басты назар тек жаңа форматқа ғана емес, сондай-ақ клубтардың кадрлық мүмкіндіктерін қалай пайдаланатынына да ауады.

Айта кетейік

Жуырда ғана “Қайрат” қақпашысы Темірлан Анарбеков “Ақтөбеге” қарсы ойында футболшымен соқтығысып, жағын сындырып алған еді. Кейін қақпашыға ота жасалатыны белгілі болды. Алдын ала болжам бойынша футболшы кемі 1,5 ай алаңға шыға алмайды.