Қазақстан ұлттық құрамасының бұрынғы бас бапкері командадан кеткеннен кейін әлі күнге дейін жаңа жұмыс таппады.
Бапкер қазір түрлі шараларға қатысып, футбол академияларында дәріс оқып жүр. Сонымен қатар телешоуларға шығып, көрермендермен ой бөлісіп келеді.
“СЭ” басылымына берген сұхбатында Черчесов өз жағдайына түсіністікпен қарайтынын айтты:
“Бапкерлік жолда әртүрлі кезеңдер болады: бірде жұмыс істейсің, бірде үзіліс аласың. Қазір ештеңе өзгермеді. “Локомотивте” және басқа академияларда дәріс оқыдым. Телевидениеге де шақырып тұрады. Уақыт бәрін көрсетеді», – деді ол.
Журналистің “Жаңа ұсыныстар бар ма?” деген сұрағына Черчесов:
“Бір агенттің айтуынша, нұсқалар бар көрінеді. Егер ол солай десе, демек, көбірек білетін шығар. Қазір РБ Премиясына қатысқалы жатырмын, достармен көрісемін”, – деп жауап берді.
Бапкер футболға деген құлшынысын жоғалтпағанын атап өтті:
“Жоқ, ондай сезім болмайды. Адам өз-өзі болып қалуы керек. Егер сен лайықты болсаң – жұмыс өзі-ақ келеді”.
