БАҚ өкілдері таратқан мәлімет бойынша Роналдудың жақындары бірнеше рет қорқыту хабарламаларын алған.
Португалиялық футболшы Криштиану Роналду өз отбасының қауіпсіздігін күшейту мақсатында оққағар жалдады. Бұл туралы Vesti.kz хабарлады.
Жергілікті БАҚ-тың мәліметінше, Роналдудың жақындары бірнеше рет қорқыту хабарламаларын алған. Осы жағдайдан соң әйгілі футболшы бұрынғы күзет қызметкерлерін жұмыстан босатып, олардың орнына тәжірибелі маманды тартқан.
Қазір Роналду мен оның отбасының қауіпсіздігіне Клаудио Мигель Вас есімді кәсіпқой маман жауапты. Ол бұған дейін танымал футболшылар — "Олимпиакос" ойыншысы Желсон Мартинс пен "Милан" шабуылшысы Рафаэль Леаоның жеке қауіпсіздігін қамтамасыз еткен. Вас қауіпті аймақтарда жұмыс істеу тәжірибесімен танымал.
Жуырда Париждегі сән апталығы кезінде Клаудио Мигель Вас тағы бір мәрте көзге түсті Ол Роналдудың жұбайы Джорджина Родригесті суретке түсірмек болған папараццилерге жол бермеген. Бұл әрекет желіде қызу талқыға түскен болатын.
Айта кетейік, 40 жастағы Криштиану Роналду бүгінде Сауд Арабиясының "Әл-Наср" клубында ойнайды. Бұған дейін ол "Спортинг" (Португалия), "Манчестер Юнайтед" (Англия), "Реал Мадрид" (Испания) және "Ювентус" (Италия) клубтарының намысын қорғаған.
