Мохамед Салах "Ливерпульмен" келісімшартты 2027 жылға дейін ұзартты.
Мерсисайдтықтар көшбасшысын сақтап қалды. Бұл туралы клубтың ресми баспасөз қызметі хабарлады. 32 жастағы мысырлық шабуылшының енді жаңа келісімі 2027 жылдың жазына дейін жарамды.
Бұл жаңалық “қызылдардың” жанкүйерлері үшін үлкен қуаныш. Себебі Салах соңғы жылдары команданың басты қозғаушы күшіне айналды.
Салах “Ливерпульге” 2017 жылы ауысып келді. Содан бері ол: 394 матчқа қатысып, 243 гол соқты, 111 нәтижелі пас берген.
Салах Англия Премьер-лигасының чемпионы, Ағылшын кубогы мен Суперкубогының иегері, екі рет Лига кубогының жеңімпазы атанды. Сонымен қатар оның есебінде: УЕФА Суперкубогы, Клубтық әлем чемпионатының алтыны және ең бастысы — Чемпиондар лигасының жеңісі бар.
“Ливерпульдің” символына айналған Салах тек голдарымен емес, өзінің үлгілі тәртібімен, жанкүйерлермен қарым-қатынасымен және алаңдағы ұмытылмас сәттерімен де есте қалды. Оның клубпен келісімшартты ұзартуы — “Ливерпульдің” алдағы маусымдарға деген амбициясын айқындап отыр.
