24 сәуірде УЕФА президенті Александер Чеферин Астанаға ресми сапармен келеді. Бұл туралы Қазақстан футбол федерациясы президентінің кеңесшісі Нұрсұлтан Құрман хабарлады.
Сапардың мақсаты – Қазақстан футболы күнін атап өту және екіжақты ынтымақтастықты нығайту. Күн тәртібіндегі басты оқиға – УЕФА басшысының Қазақстан президенті Қасым-Жомарт Тоқаевпен кездесу.
Мемлекет басшысы мен УЕФА президенті футбол саласындағы стратегиялық әріптестік, инфрақұрылымдарды дамыту, сондай-ақ Қазақстанның Еуропалық футбол қауымдастығындағы орны жайлы мәселелерді талқылауы мүмкін.
Бұл кездесу Қазақстан футболының халықаралық аренадағы беделін арттырып, жаңа жобаларға жол ашуы ықтимал.
Еске сала кетейік, ақпанда КФФ президенті Марат Омаров УЕФА-ның штаб-пәтері орналасқан Ньон қаласына барып, Александер Чеферинмен кездесу өткізген. Кездесу кезінде Омаров УЕФА басшысын Қазақстанға шақырды. Чеферин оны қабыл алды.
Астанадағы сапар барысында УЕФА президенті елордадағы бірқатар спорт нысанына барып, жас футболшылармен жүздеседі. Бұл – жастарды қолдау және футболды бұқаралық спорт ретінде дамытуға бағытталған маңызды қадамдардың бірі.
