Мадридтік "Реалдың" бас бапкері Карло Анчелотти келесі аптада клубтан кетуі мүмкін. Итальяндық маман Бразилия ұлттық құрамасының жаңа жаттықтырушысы болуға бір табан жақын.
Хабарламада айтылғандай, Анчелотти мен Бразилия футбол конфедерациясы (CBF) арасындағы келіссөздер мамыр айында жалғасады. Күтулерге қарағанда, әйгілі жаттықтырушы "Реал Мадридті" алдағы аптада ресми түрде тастайды.
Relevo деректері бойынша, соңғы айларда Анчелоттимен келіссөз жүргізген CBF өкілі Диего Фернандеш Севильяда бапкермен тағы бір рет кездескен. Бразилиялық бизнесмен Испания Кубогының финалында "Барселонаға" қарсы өткен матчта (2:3) стадионда болды.
Басты сұрақ — Анчелотти Бразилия құрамасына нақты қай уақытта қосылады: мамырда ма, әлде 30 маусымнан кейін бе? Басқа мәселелер бойынша екі тарап ортақ келісімге келген, бірақ келісімшартқа әлі қол қойылған жоқ.
Белгілі инсайдер Фабрицио Романоның мәліметінше, Бразилия футбол конфедерациясы Анчелоттидің ұсынысты қабылдайтынына сенімді. Ол клубтық әлем чемпионаты басталар алдында құрамамен жұмыс істеуге кіріседі деп күтілуде.
Ақпарат көздеріне сүйенсек, Бразилия тарапы Анчелоттиге 2030 жылға дейін жарамды келісімшарт ұсынбақ. Ел футболшылары 2026 және 2030 жылғы әлем чемпионаттарында итальяндық бапкердің тәжірибесіне арқа сүйемек. Еске салсақ, Бразилия құрамасы 2002 жылдан бері әлем чемпионы атанған жоқ, ал соңғы бес турнирдегі нәтижелері көңіл көншітпеді.
