Қазақстандық жас талант келесі жылы "Челси" сапына қосылады.
Әлем футболының жұлдызы, «Аякс», «Ливерпуль» және Нидерланд құрамасының бұрынғы ойыншысы Райан Бабел қазақстандық шабуылшы Дастан Сәтпаевтың лондондық «Челси» клубына ауысуына қатысты пікір білдірді. Бұл туралы Sports.kz хабарлады.
“Сіздер менің пікірімді сұрадыңыздар. Мен Дастанға «Челсидің» академиясында жаттықтырушылардың барлық кеңестерін мұқият тыңдауға кеңес беремін. Жергілікті мәдениетті тезірек меңгергені маңызды. Оның ағылшын тілін қаншалықты білетінін білмеймін, бірақ командалық ортаға бейімделуде бұл шешуші рөл ойнайды. Ең бастысы — өз күшіне сену керек. Кейде жанкүйерлердің қысымы үлкен болады, мұндай сәттерде мақсатқа шоғырлану оңай емес”, — деді Райан Бабел.
Бұдан бөлек, Бабел өзбекстандық қорғаушы Абдукодир Хусановтың «Манчестер Сити» сапына ауысуына да пікір білдірді:
“Иә, мен бұл трансфер туралы естідім. Қазақстан мен Өзбекстан сияқты елдер үшін бұл өте маңызды жетістік. Егер мұндай таланттар шығып жатса, онда ірі клубтардың скауттары бұл нарыққа көбірек назар аударатын болады. Мысалы, менің бұрынғы клубым «Аякс» әрдайым жас әрі перспективалы ойыншыларды тауып, оларды жаңа деңгейге көтеруге тырысады”, — деп қосты ол.
