Жуырда өткен айдың үздіктері кім екені анықталды.
Қазақстан Премьер-Лигасының (ҚПЛ) наурыз айындағы үздіктері ресми түрде жарияланды.
"Астана" футбол клубының бас бапкері Григорий Бабаян наурыз айында "Айдың үздік бапкері" атағына ие болды. Оның жетекшілігіндегі астаналықтар 3 матч өткізіп, екеуінде жеңіске жетсе, біреуінде тең нәтижеге қол жеткізді. Бұл көрсеткіш команданың тұрақты өнер көрсетуін және маусым басындағы сенімділігін дәлелдеді.
"Астана" шабуылшысы Марин Томасов наурыз айының "Үздік ойыншысы" атанды. Хорватиялық футболшы ай бойы жоғары деңгейде өнер көрсетіп, 4 гол және 1 нәтижелі пас авторы атанды. Оның тамаша формасы "Астананың" көшбасшылық орнын сақтап қалуына үлкен үлес қосты.
Алматылық "Қайраттың" жас шабуылшысы Дастан Сәтпаев "Айдың үздік жас ойыншысы" атанды. 16 жастағы талантты футболшы 1 гол соғып, тағы 1 нәтижелі пас беріп, өзінің жарқын ойынымен көзге түсті. Айта кетейік, Дастан жуырда Лондонның "Челси" клубымен келісімшарт жасасатыны белгілі болды.
