Қазақстан құрамасында жарақат мәселесі ушығып тұр.
Қазақстан ұлттық құрамасының бас бапкері Әли Әлиев Беларусь және Солтүстік Македонияға қарсы ойындар алдында командадағы басты қиындықтарды атады. Оның айтуынша, жарақат алған ойыншылардың саны көбейіп, негізгі құрамға әсерін тигізуде.
Әлиевтің айтуынша, ең маңызды ойыншылардың бірі — Бақтиер Зайнутдинов жарақатына байланысты құрамадан тыс қалды. Бұл команданың тактикалық әлеуетін төмендетіп отыр.
"Бақтиердің жоқтығы — біз үшін үлкен мәселе. Бірақ Алла қаласа, оның орнын толтыруға тырысамыз. Бұған дейін де қиын сәттерден өттік — Лихтенштейнмен, Уэльспен, Кюрасаомен кездесулерде команда берілмеді", — деді бас бапкер.
Сондай-ақ, Исламбек Қасым оқу-жаттығу жиынының соңғы күнінде жарақат алып, жамбастың бұлшықетінде бірінші және екінші дәрежелі жарақат тіркелген.
"Ол ұлттық құрамаға шын ниетімен келді. Өкінішке қарай бұл жолы көмектесе алмайды", — деді Әлиев.
Тағы бір тәжірибелі ойыншы Серікжан Мұжықов та құрамға шақырылғанымен, ол өзін 100 пайыз дайын емес екенін жеткізген.
"Жиында тәжірибе жасап, тәуекелге бара алмаймыз. Тек физикалық және психологиялық тұрғыдан толық дайын футболшыларға сенім артамыз", — деп түсіндірді бапкер.
5 маусымда Қазақстан құрамасы Беларусьпен жолдастық кездесу өткізеді. Ал 9 маусымда Солтүстік Македонияға қарсы 2026 жылғы Әлем чемпионатына іріктеу ойыны өтеді.
