Бұл матч 2026 жылғы әлем чемпионатының іріктеу кезеңі аясында өтеді.
Қазақстан – Солтүстік Македония кездесуі 9 маусым, дүйсенбі күні өтеді. Бұл матч – біздің құрама үшін турнирлік жағдайды түбегейлі өзгерте алатын маңызды сәттердің бірі.
Қазақстан құрамасы Әли Әлиевтің жетекшілігімен іріктеу кезеңін Уэльске қарсы 1:3 есебімен жеңіліспен бастады. Дегенмен келесі ойында сенімді түрде Лихтенштейнді 2:0 есебімен жеңіп, алғашқы үш ұпайына иелік етті.
Солтүстік Македония Лихтенштейнге қарсы 3:0 есебімен айқын басымдық танытты. Одан кейін Уэльспен (1:1) және топ фавориті Бельгиямен (1:1) тең ойнап, төрт ұпай жинады.
Қазіргі турнирлік жағдайды ескерсек, бұл кездесу екі құрама үшін де шешуші болуы мүмкін. Қазақстан құрамасы өз алаңында ойнап, жанкүйерлердің қолдауына сенім артады.
