Елдос Ахметовтың айтуынша, жастардың даму қарқыны қуантады және болашақта жеңістер міндетті түрде келеді.
Қазақстан құрамасының бас бапкерінің көмекшісі Елдос Ахметов 2026 жылғы әлем чемпионатының іріктеу кезеңіндегі Солтүстік Македонияға қарсы өткен матчтың нәтижесі туралы пікірімен бөлісті.
"Нәтиже нашар болғанымен кеше жақсы ойнадық. Шабуылдар ұйымдастырып, гол салғымыз келді. Бір рет маңдайша, бір рет бағанаға тигіздік. Солардың бірі голға айналса қазір басқаша сөйлер едік. Македония ойыншысы Элиф Элмастың өзі осылай айтты. Біз мықты ойнадық, алайда ең ақыры 1 ұпай да алмадық".
Бұдан бөлек, Елдос Ахметов талантты жастардың өсіп келе жатқанына тоқталып, жеңісті күндер алда екеніне сенім білдірді.
"Бірақ, бір нәрсе анық. Біздің жастар прогрес жасап келе жатыр. Осы қарқыннан таймасақ, түбі жеңістер болады. Бұл футболдың өзінің жазылмаған заңы.
Жанкүйерлерде де, бапкерлік штаб та да бірдей сезімдер шығар. Іште сәл бір қынжылыс бар. Осындай сезімдерді бірге кеше білсек, қуанатын кезде де бірге қуанамыз!", - деді Елдос Ахметов өзінің инстаграм-парақшасында.
Кеше Қазақстан құрамасы 2026 жылғы әлем чемпионатының іріктеу турнирі аясында Солтүстік Македонияға қарсы өз алаңында матч өткізді. Кездесу македониялықтардың 1:0 есебімен жеңісімен аяқталды.
