Алматытың "Қайраты" Словения чемпионаты мен еурокубоктарда көзге түскен 28 жастағы Эдмилсонмен келіссөз жүргізіп жатыр.
Эдмилсон соңғы екі маусымда словениялық "Целе" клубының намысын қорғады. Осы кезеңде ол 73 кездесуге қатысып, 19 гол соқты және 8 нәтижелі пас берді. Оның көмегімен "Целе" ел біріншілігін жеңіп, Словения кубогының иегері атанды.
Ең әсерлі жетістіктерінің бірі – УЕФА Конференциялар лигасындағы ойын. 2024/25 жылғы маусымда Эдмилсон бастаған "Целе" ширек финалға дейін жетіп, тек Италияның "Фиорентина" клубына жол берді. Осы турнирде бразилиялық футболшы Уэльстің "Нью-Сейнтс" командасының қақпасына екі гол соқты.
Қазір Эдмилсон Алматыда. Келісімшарт жақын күндері жарияланады. Егер келісім рәсімделсе, футболшы Қазақстан премьер-лигасында "Жетісуға" қарсы алғашқы ойынына шыға алады.
Бұған дейін кейбір ақпарат көздері "Қайраттың" шабуыл шебін Ресей құрамасының экс-ойыншысы Федор Смолов толықтыруы мүмкін екенін жазған. Алайда клубтың баспасөз қызметі бұл мәліметті ресми түрде жоққа шығарды.
