АҚШ, Канада және Мексикада өтетін футболдан әлем чемпионатына тағы екі ұлттық құрама мерзімінен бұрын жолдама алды.
Пентакампеондар Парагвайды 1:0 есебімен жеңіп, маңызды үш ұпайға қол жеткізді. Ал Эквадор сырт алаңда Перу құрамасымен тең ойнап (0:0), қажетті ұпайды еншіледі.
Аталған нәтижелердің арқасында Бразилия мен Эквадор 25 ұпай жинап, жетінші орында тұрған Венесуэладан 7 ұпайға озып кетті. Бұл — КОНМЕБОЛ аймағындағы алғашқы алты орын иелеріне берілетін тура жолдаманы кепілдейді.
Осылайша Бразилия мен Эквадор 2026 жылғы әлем чемпионатына іріктеу кезеңінің аяқталуына екі тур қалғанда-ақ қатысу құқығына ие болды.
Бұған дейін Аргентина құрамасы да іріктеуді ерте аяқтап, әлем чемпионатына қатысу мүмкіндігін жеңіп алған. Қазір аргентиналықтар КОНМЕБОЛ іріктеу кестесінде көш бастап тұр.
Эквадор құрамасы ұпай саны тең болғанына қарамастан гол айырмасы мен жеке көрсеткіштері арқылы Бразилиядан жоғары орналасқан.
