Клубтық әлем чемпионатының топтық кезеңіндегі кезекті матчта "Ювентус" пен морокколық "Видад" алаңға шықты.
Ойын басталысымен "Ювентус" шабуылға ден қойып, 6-минутта-ақ есеп ашты. Дегенмен бұл голды өз қақпасына Абделмунаим Бутуил соғып алды. Ал 10 минуттан кейін Кенан Йылдыз нәтижені еселей түсті.
25-минутта Тембинкоси Лорч "Видадтың" есепті қысқартты. Алайда бұл тек жалғыз жұбаныш болды. Екінші таймда Кенан Йылдыз тағы бір гол соғып, дубль авторы атанды. Ал матчтың қосымша минуттарында Душан Влахович пенальтиден мүлт кетпей, қорытынды есепті бекітті — 4:1.
Бұл жеңістен кейін "Ювентус" G тобында 6 ұпаймен бірінші орынға жайғасты. Ал "Видад" екі матчтан кейін де ұпайсыз қалып, үшінші орында тұр. "Манчестер Сити" үш ұпаймен екінші болса, "Әл-Айнде" ұпай жоқ.
