Шымкенттің "Ордабасы" ФК ивуарлық қорғаушы Шериф Жимомен арадағы келісімді мерзімінен бұрын үзгенін ресми түрде мәлімдеді.
“Шериф Жимо мен клуб арасындағы келісімшарт өзара келісім негізінде тоқтатылды”, — делінген “Ордабасының” Instagram парақшасында жарияланған хабарламада.
29 жастағы Жимо Шымкент ұжымына 2025 жылдың ақпанында Беларусьтің БАТЭ клубынан ауысқан болатын. Ол “Ордабасы” сапында 20 матч өткізіп, бір гол соққан.
Transfermarkt дерегінше, футболшының қазіргі нарықтық құны — 250 мың еуро.
ҚПЛ-дың 17 турында “Ордабасы” 26 ұпай жинап, турнирлік кестеде 7-орынға тұрақтаған. Сонымен қатар, клуб УЕФА Конференциялар Лигасының бірінші іріктеу кезеңінде Грузияның “Торпедо” (Кутаиси) клубына екі матч қорытындысы бойынша (4:5) есе жіберіп, жарыстан шығып қалды.
