Жанкүйерлер әйгілі "Уэмбли" стадионында күтпеген нәтижеге куә болды. Суперкубок үшін "Ливерпуль" мен "Кристал Пэлас" арасындағы матч нағыз драмаға толы өтті.
Негізгі уақыт 2:2 есебімен аяқталды. "Ливерпуль" сапынан Юго Экитике (4-минут) және Джереми Фримпонг (21-минут) гол соқты. Ал "Кристал Пэлас" құрамында Жан-Филипп Матета (17-минут, пенальтиден) мен Исмаила Сарр (77-минут) мергендігімен көзге түсті.
Жеңімпаз негізгі уақытта анықталмағандықтан ойын пенальти сериясына ұласты. Қақпашылардың шеберлігі мен ойыншылардың жүйкесін сынаған серияда "Кристал Пэлас" 3:2 есебімен жеңіске жетіп, Суперкубок иегері атанды.
"Ливерпуль" жаңа маусымдағы алғашқы АПЛ матчын 15-16 тамыз түні өз алаңында "Борнмутқа" қарсы өткізеді.
"Кристал Пэлас" болса, 17 тамызда сырт алаңда "Челсиге" қонаққа аттанады.
