Футболдан 2014 жылғы әлем чемпионы, Германия құрамасының бұрынғы бас бапкері Йоахим Лёв Өзбекстан ұлттық құрамасын басқару жөніндегі ұсынысты қабылдамады.
Bild дерегінше, Лёв Өзбекстан футбол қауымдастығы өкілдерімен Берлиндегі елшіліктің қолдауымен онлайн форматта келіссөз жүргізген. Ұсынысты ол бірнеше күн ойланып көргенімен соңында бас тарту туралы шешім қабылдаған.
Лёвтің айтуынша, бұл шешімге оның жұбайы Даниэлла Шмидтің пікірі әсер еткен. Олар 1978 жылы танысып, кейін отбасы құрған. Даниэлла күйеуінің басқа елде жұмыс істеуін қаламай, олардың тыныш зейнет өмірін жалғастырғанын жөн көрген.
65 жастағы маман 2014 жылы Германия құрамасын әлем чемпионы атағына жеткізіп, сол жылы ФИФА тарапынан “Жылдың үздік бапкері” деп танылды. 2021 жылдың наурыз айында Германия құрамасынан кеткеннен бері ол ешбір клуб немесе ұлттық команданы жаттықтырмаған.
