Мадридтің "Реалы" Вальдебебас базасында өткізген жаттығуда күтпеген жағдай орын алды. Don Balon таратқан мәліметке сүйенсек, бразилиялық шабуылшы Винисиус Жуниор мен бас бапкер Хаби Алонсо арасында жанжал шыққан.
Оған себеп – сол қапталдағы өзгеріс. Бұл аймақ әдетте Винисиустың негізгі позициясы саналса, енді оны жаңа жұлдыз — Килиан Мбаппе иеленуі тиіс.
Алонсоның айтуынша, Мбаппе сол қапталда ойнағанда жылдамдығын тиімді пайдаланып, қарсыластарға көбірек қауіп төндіре алады. Бірақ Винисиус өзін бұл позициядан шеттету – командадағы беделіне соққы деп қабылдаған.
Бұл жағдай тек алаңда ғана емес, "Реалдың" ішкі атмосферасына да әсер еткен. БАҚ–тар хабарлағандай, кейбір ойыншылар Винисиустың көңілін қалдырмау керек десе, өзгелері Алонсоның тактикалық шешімін қолдап отыр. Жағдай қатты ушығып кеткендіктен, Феде Вальверде мен Дани Карвахаль секілді футболшыларға екі жақты сабырға шақыруға тура келген.
Бұл жанжал "Реалдың" алдағы жоспарына әсер етуі мүмкін. Егер компромисс табылмаса, сол қапталдағы тартыс ұзаққа созылып, клубтың ішкі тұрақтылығына қауіп төндіреді. Ал "Реал" жаңа маусымды 19 тамыз күні "Осасунаға" қарсы ойында бастайды. Бұл кездесу команданың бірлігі мен тактикалық дайындық деңгейін анықтайтын алғашқы үлкен сынақ болмақ.
Айта кетейік, "Реалдың" басты қарсыласы саналатын "Барселона" Ла Лиганы сенімді түрде бастап, алғашқы матчында ірі жеңіске жетті. Бұл да мадридтік клубқа қосымша қысым түсіріп отыр.
