"Интер Майами" клубының президенті әрі әлемдік футбол аңызы Дэвид Бекхэм Аргентина құрамасының Венесуэлаға қарсы ойынынан кейін (3:0) Лионель Мессиге арнап әлеуметтік желідегі парақшасында жазба қалдырды. Бұл кездесу 2026 жылғы әлем чемпионатының іріктеу турнирінің 17-туры аясында өтті. Матчта «фламингоның» жұлдызы қос гол соғып, жанкүйерлерін қуантты.
38 жастағы Месси үшін бұл ойын ұлттық құрамадағы соңғы үйдегі кездесулердің бірі болуы ықтимал. Аргентиналық жанкүйерлер үшін бұл ерекше сәт еді, себебі олар өз аңыздарын лайықты түрде құрметтеді.
Дэвид Бекхэм Мессидің ұлы еңбегін атап өтті:
«Ерекше кеш, қайталанбас тұлға. Ол барлығына қол жеткізгенімен, әлі де үлкен мақсаттар қояды — өзі үшін емес, елі үшін. Бұл кеште Аргентина Леоны лайықты түрде құрметтеді. Құттықтаймын, Лео!»
Лионель Месси Аргентина құрамасының тарихындағы ең үздік ойыншы ретінде қалыптасты. Ол ұлттық құрама сапында 194 матчқа қатысып, 114 гол соқты және 61 нәтижелі пас берді.
