Астана әкімдігі футбол клубына ₸223 млн бөлмек

Қаржының мақсаты

Kazinform-ның хабарлауынша бөлінген қаражат астаналық негізгі команданың Премьер-лига мен Қазақстан кубогындағы қатысуын қамтамасыз етуге бағытталмақ. Яғни клуб ресми түрде елорда атынан келесі маусымда басты ішкі жарыстарға қатысуға тиіс.

Байқау шарттары

Конкурсқа қойылған талаптар бойынша жеткізуші мына міндеттерді орындауы тиіс:

• клубты лицензиялау, мүшелік жарналар мен өтінім алымдарын төлеу;
• елордадағы үй матчтарының төрешілік және инспекция шығындарын жабу;
• команданың басқа өңірлерге сапарын ұйымдастыру;
• әкімшілік және бапкерлік құрамды қамтамасыз ету;
• ойыншыларды форма, тұрғын үй, тамақ, медициналық қызмет және сақтандырумен қамту;
• тұрақты жаттығу мен оқу-жаттығу жиындарын өткізу;
• Астанада (қажет болса, көрші аймақтарда) үй матчтарын өткізу.

Имидждік талаптар

Жобаға қосымша имидждік талаптар да енгізілген:

1. клубтың формасында міндетті түрде Астана қаласының логотипі болуы керек;
2. әлеуметтік желілерде кемінде 20 мың адамды қамтитын ақпараттық жұмыс жүргізуі қажет;
3. команда символикасымен сувенирлік және полиграфиялық өнімдер шығару қарастырылған.

Құрам мен талаптар

Команда құрамында кемінде 25 кәсіби футболшы болуы тиіс. Оның ішінде кем дегенде 13 ойыншы — отандық футболдың тәрбиеленушісі болуы шарт. Легионерлерге рұқсат берілгенімен барлық құжат заңды рәсімделуі тиіс.

Қай клубқа бөлінетіні белгісіз

Конкурс құжатында қаражат нақты қай клубқа бағытталатыны көрсетілмеген. Келесі маусымда Астананың намысын екі команда — «Астана» мен «Жеңіс» қорғайды.

Өтінімдерді қабылдау 17 қыркүйекте басталып, 24 қыркүйекте аяқталады.