Ұлттық құрама және «Ақтөбе» ФК қорғаушысы Әлібек Қасымға клуб басшылығы ресми түрде 200 миллион теңге көлемінде өтемақы белгіледі.
Қорғаушының «Ақтөбемен» келісімшарты әлі бір маусымға жарамды. Құжатта көрсетілген арнайы тармаққа сәйкес, егер ойыншыны ҚПЛ-дың басқа клубы сатып алғысы келсе, 200 миллион теңге көлемінде өтемақы төлеуге міндетті. Бұл туралы asnews.kz жазады.
Ал шетелдік клубтар үшін бұл сома 100 миллион теңге болып бекітілген. Бұл — жергілікті футболшы үшін өте жоғары нарықтық баға саналады.
КПЛ-2025 маусымы аяқталған соң, БАҚ-та Әлібек Қасымның "Ақтөбеден" кетуі мүмкін деген ақпарат тарады. Қорғаушыға елдің алдыңғы қатарлы екі клубы — «Астана» мен «Елімай» қызығушылық білдіріп отыр.
Егер трансфер жүзеге асса, бұл қазақстандық ішкі футбол нарығындағы ең ірі ауысулардың бірі болмақ.
24 жастағы қорғаушы соңғы жылдары Қазақстан құрамасының негізгі ойыншыларының біріне айналды. Ол «Ақтөбе» сапында сенімді ойынымен көзге түсіп, бірнеше маусым қатарынан үздік қорғаныс статистикасын көрсетіп келеді.
