Қазақстан Еуро іріктеуінде сенсация жасады
Қазақстанның 17 жасқа дейінгі футболшылар құрамасы 2025/26 жылғы Еуропа чемпионатының іріктеу кезеңінде күтпеген жеңіске жетті.
Хорватиядағы тарихи нәтиже
Бауыржан Сағындық жаттықтыратын Қазақстан U-17 құрамасы Неделище қаласында қожайын елдің командасын 2:1 есебімен жеңіп, сенсация жасады.
Ойынның 2-минутында Ислам Рақым есеп ашты. 33-минутта хорватиялық Юрай Фриган пенальтиден есепті теңестірді. Дегенмен үзіліске дейін Расул Әкісов 45-минутта тағы бір гол соғып, Қазақстанды алға шығарды.
Хорватиялықтар жіберіп алған мүмкіндік
Екінші таймның басында хорватиялықтар есепті теңестіру мүмкіндігіне ие болды, алайда Лука Бартолович 57-минутта пенальтиден мүлт кетті. Осылайша қазақстандықтар жеңісті сақтап қалды.
Қазақстан U-17 құрамасы қатысып жатқан 8-топтың матчтары Хорватияда өтіп жатыр. Бұл топта Қазақстанмен бірге Хорватия, Нидерланд және Албания құрамалары бар.
Біздің жас футболшылар келесі ойынын 14 қарашада Нидерландпен, ал соңғы кездесуін 17 қарашада Албаниямен өткізеді.